Mbeturinat nga një raketë kineze pritet të bien në Tokë në mënyrë të pakontrolluar këtë fundjavë. Radarët që merren me vendodhjen e objekteve në hapësirë kanë vëzhguar me hollësi lëvizjen e raketës “Long March 5B”, e cila ka dalë jashtë kontrollit.
Me peshë prej 18-tonësh, raketa kineze është një ndër objektet më të rënda në dekadat e fundit që ka lëvizje të lirë dhe të pakontrolluar në atmosferë. BBC ka publikuar një hartë me zonat ku mund të bjerë raketa.
Harta është mjaft e gjerë dhe në të nuk përcaktohet ndonjë vendodhje e përafërt. Ajo përfshin sipërfaqe të madhe tokësore dhe ujore të planetit tonë.
Në zonën ku raketa mund të bjerë përfshihet territori i plotë i Afrikës, pjesa jugore e Azisë, jugu i Evropës, pothuajse tërë territori i Australisë, pjesa më e madhe e Amerikës Jugore, pjesa më emadhe e Shteteve të Bashkuara.
Në këtë zonë përfshihen edhe pjesa qendrore dhe jugore e Shqipërisë dhe një pjesë e Maqedonisë.
