Një mbrëmje magjike mbushur me emocione, freski dhe qetësi ka përjetuar publiku në Parkun helen, pranë liqenit të Farkës, në Tiranë. Aktiviteti në vijim të festivalit Ndërkombëtar “Takimet Muzikore të Dy Botëve” ka bërë bashkë muzikën dhe poezinë greke, duke sjellë për publikun një të mërkurë të paharrueshme.
Dy artistët e njohur në skenat greke dhe evropiane Vangjel dhe Fernando Nina sollën për pjesëmarrësit një program të përzgjedhur me muzikës klasike, të cilat u ndërthurën me poezi bashkekohore greke.
Vangjel dhe Fernando Nina, at e bir, janë dy emra të njohur jo vetëm në skenat greke, por dhe ato europiane, dhe jo pa qëllim janë bërë bashkë në këtë koncert.
Nga muzika tek poezia dhe interpretimi i asaj greke, për të gërshetuar art elitar në një mbrëmje të vetme, ku emocionet ishin të mëdha. Për interpretimin e poezisë, organizatorët kishin përzgjedhur artisten Ema Andrea, e cila i dha jetë vargjeve të përkthyera nga Sokol Çunga.
Ky aktivitet u realizua nga organizata “Argjiro” në partneritet me Ambasadën Greke ne Tiranë, Bashkinë e Tiranës, Fondacionin Helen për Kulture dhe Agjensinë e parqeve dhe të rekreacionit.
Takimet Muzikore të Dy Botëve, dëshmuan mbrëmjen e djeshme edhe një herë se kanë për qëllim të ndihmojnë sadopak në rritjen e shkëmbimeve kulturore të Shqipërisë në Evropë e më gjërë, në shërbim të vlerave kulturore, artistike, historike e njerëzore, të forcojë kontaktet e drejtpërdrejta ndërmjet artistëve shqiptare dhe të huaj, si dhe të edukojmë publikun me një art cilësor.
Pjesë e Festivalit Takimet Muzikore të Dy Botëve është këtë vit dhe botimi i Antologjisë e Poezisë Bashkohore Greke.
Antologjia e Poezisë Bashkëkohore Greke, një botim dygjuhësh, i ofron lexuesit shqiptar një përzgjedhje të pashoqe të disa prej zërave më të pasur dhe më emocionues të kohës. Shumica e poetëve të përfshirë në të janë të rinj, por ata bartin me vete bagazhin e një tradite të pasur të poezisë greke, duke u bërë kështu pjesë e periudhës post-moderne të shkruar pas konsolidimit të shtetit demokratik në vitet ’70.
Festivali Takimet Muzikore të Dy Botëve, vijon kështu rrugëtimin e tij, duke sjellë dhe përçuar vlera tek publiku, nëpërmjet aktiviteteve cilësore. Erjola Azizolli/shtator2021
