“Keqtrajtimi i kafshëve”, policia proçedon penalisht 50 vjeçarin, tërhoqi pas makinës qenin e tij

Policia e Durrësit, njoftoi pak momente më parë, se nisi proçedimin penalisht për një 50 vjeçar, nga Sukthi, i cili akuzohet se keqtrajtoi qenin e tij, të cilin e lidhi pas makinës.

“Duke marrë shkas nga një foto e publikuar në rrjetet sociale, ku paraqitej një kafshë shtëpiake (qen), duke u tërhequr pas një makine, në Sukth, Durrës, ju sqarojmë se:

Specialistët për Hetimin e Krimeve në Komisariatin e Policisë Durrës menjëherë identifikuan dhe shoqëruan në ambientet e Policisë, bashkë me mjetin e tij tip “Renault”, shtetasin F. P., 50 vjeç, banues në Sukth, Durrës.

Në vijim të veprimeve u procedua penalisht shtetasi F. P., për veprën penale “Keqtrajtimi i kafshëve”  parashikuar nga neni 207/c paragrafi 2 si dhe nga shërbimet e Policisë të Qarkullimit Rrugor është vendosur masë administrative në bazë të dispozitave të Kodit Rrugor, sipas neneve 158, 182 dhe 139/14/5/8.

Materialet i kaluan Prokurorisë së Rrethit Gjyqësor Durrës, për veprime të mëtejshme”, njofton Policia Vendore e Durrësit.

Nga ana tjetër policia bën me dije se për çdo rast paligjshmërie qytetarët të njoftojnë 112 dhe do të mbeten anonim në denoncimet e tyre.

“Policia e Durrësit fton qytetarët të denoncojnë në numrin 112 dhe Komisariatin Dixhital, çdo rast të paligjshmërisë në tërësi, duke iu garantuar anonimatin dhe reagim të shpejtë e të paanshëm”.