Sako: Problemi i evedimit të mbetjeve urbane të Durrësit, do të marrë zgjidhje brenda 6 mujorit

Problemi i evadimit të mbetjeve urbane të Durrësit, që u shndërrua në një shqetësim për banorët, jo vetëm të qytetit, por edhe të njësive vendore mbetet i hapur. Zgjidhja e përkohshme 4 mujore, për t’i dërguar në Sharrë ka normalizuar situatën e krijuar rreth dy javë më parë. Ndërkohë, që kjo periudhë po shfrytëzohet nga institucioni i qeverisjes vendore, për të mos ripërsëritur odisenë e gjetjes së një vendgrumbullimi për mbetjet urbane.

Nga aktiviteti i zhvilluar në mjediset e Muzeut Arkeologjik, ku ishte e pranishme, kryetarja e emëruar e Bashkisë së Durrësit, Emiriana Sako i ka dhënë përgjigje interesimit të gazetarëve, në lidhje me këtë çështje.

Bashkia dhe Qarku po ndërmarrin hapa ligjorë, që do të japin mundësinë e një vlerësimi, lidhur me aspektin financiar, për të mundësuar një zgjidhje përfundimtare dhe të përballueshme nga autoriteti vendor tha kryebashkiakja Sako, duke siguruar taksapaguesit se brenda këtij 6 mujori do t’i hapet rrugë problemit të krijuar.Në të njëjtën kohë, drejtuesja e  Bashkisë së Durrësit ka siguruar se po punohet me prioritet nga institucionet përgjegjëse për zgjidhjen e kësaj çështjeje.

Mbyllja e landfillit në Porto Romano ka krijuar një ngërç institucional për evadimin e mbetjeve urbane të Durrësit. Që në nisje, Bashkia e Durrësit  shpalli pafuqinë financiare, për t’i dërguar këto mbetje në Sharrë, duke e shndërruar qytetin në një vatër infeksioni.

Kërkimet për një vendgrumbullim në një nga njësitë vendore, nën juridiksionin e institucionit të qeverisjes vendore Sukth apo Manëz rezultuan të pasuksesshme, pasi hasën në kundërshtinë e banorëve të këtyre zonave.

Ndërkohë, këshilli bashkiak  shpalli gjendjen e emergjencës mjedisore.
Për 4 muajt në vijim, mbetjet urbane të Durrësit, do të depozitohen në Sharrë. Kohë që do t’i shërbejë autoritetit vendor t’i japë zgjidhje përfundimtare problematikës së krijuar.