Lëvizja Socialiste për Integrim ka bërë një nismë për regjistrimin e të dënuarve për krime seksuale, duke marrë shkas nga ngjarjet e fundit të bëra publike ku viktima janë fëmijë të mitur.
Në një dalje për mediat nga Kryesia e Kuvendit, deputetja e LSI-së, Erisa Xhixho tha se ky regjistër do të shërbente për monitorimin e ‘grabitqarëve seksualë’.
Xhixho tha se për këtë nismë ligjore do të organizohen konsultime, ndërsa bëri thirrje që të mbrohen fëmijët, vajzat dhe gratë nga ngacmimet seksuale.
Deklarata e LSI
Mirëdita dhe më lejoni t’ju falenderoj paraprakisht për vëmendjen!
Jam sot këtu në këtë konferencë shtypi, t’ju informoj edhe zyrtarisht për nismën time ligjore, për të bërë objekt të shqyrtimit dhe të miratimit në Kuvend ligjin për ‘Regjistrin Kombëtar të të Dënuarve për Krime Seksuale”.
Duke e ftuar Kuvendin që të bëhet i gjithi pjesë e kësaj nisme, në fakt unë synoj të përfshij gjithashtu edhe rrjetin e OJQ-ve, të gjithë shoqërinë tonë që të ndërgjegjësohet për domosdoshmërine e këtij ligji.
E tronditur pas ngjarjeve ulëritese të fundit, ku rasti me i fundit i drejtorit të shkollës në qytetin e Pogradecit për ngacmimin seksual ndaj dy të miturave, apo dhunimit shtazarak të vajzës 6-vjeçare nga i ati dhe përdhunimit që në moshën 12-vjeçare të një tjetër vajze në Jug të vendit nga një familjar mbi 50-vjeçar, vendosa ta përshpejtoj nismën time që është produkt i bashkëpunimit edhe me CRCA/ECPAT-n në Shqipëri.
Në këto ditë të vështira jam pranë vajzave dhe familjeve të tyre.
Krimet seksuale nuk kanë qenë kurrë kaq goditëse, kaq të hapura ,kaq të larta në numër.
Vetëm gjatë periudhës prej 1 Janarit 2019 deri më 1 Qershor 2020, 66 fëmijë kanë rënë pre e ngacmimit dhe dhunës seksuale nga persona të afërt apo janë dhunuar seksualisht nga familjarë të tyre, 3 prej tyre (vajza) janë vetëvrarë.
Ndaj kam dorëzuar në Kuvend projekt-ligjin për Regjistrin e Krimeve Seksuale, miratimi i tij zgjidh një herë e mirë regjistrimin e çdo grabitqari seksual dhe mbrojtjen e fëmijëve e grave nga dhuna seksuale! Kjo nisëm bëhet edhe në kuadër të muajit të Fiongos Blu, ditëve ndërkombëtare kundër dhunës ndaj fëmijëve dhe të drejtat e tyre.
Regjistri Kombëtar për të Dënuarit për Krime Seksuale do të jetë një instrument i shtetit shqiptar për të luftuar dhe parandaluar krimet seksuale.
Në hartimin e këtij projekt-ligji janë marrë për bazë eksperienca më të mira nga një sërë vende të BE-së si (Britania, Irlanda, Franca etj) dhe atyre të rajonit (psh Maqedonia e Veriut).
Hartimi i këtij projektligji është diktuar nga nevoja për krijimin e një mekanizmi ligjor-institucional efektiv, parandalues për mbrojtjen e fëmijëve, të rinjve, grave dhe çdo viktime seksuale të mundshme nga grabitqarët seksualë.
Projekt-ligji ka për qëllim inkurajimin dhe përgatitjen e organeve kompetente shtetërore për të mbrojtur fëmijët, të rinjtë, gratë dhe çdo individ nga dhuna dhe shfrytëzimi seksual, vepra penale që prekin jo vetëm dinjitetin e individit, por edhe shkaktojnë pasoja të rënda në funksionimin normal të qenies njerëzore, duke siguruar që regjistri të jetë një mjet efektiv për të identifikuar vendodhjen e të dënuarve për krime seksuale dhe monitorimin e aktivitetit të tyre.
Regjistri i mundëson Policisë së Shtetit dhe organeve të tjera ligjzbatuese që të identifikojnë dhe monitorojnë grabitqarët seksualë, pedofilët dhe personat që kanë tendencë për të kryer krime seksuale, duke disponuar informacion të detajuar lidhur me të dhënat personale, vendbanimin, rrethin shoqëror, komunikimet, veprimtarinë dhe punën e tyre etj.
Regjistri, gjithashtu garanton ndalimin e personave të dënuar për krime seksuale për t’u punësuar/angazhuar si pjesë e personelit të institucioneve, agjencive, organizatave dhe çdo subjekti shtetëror dhe jo shtetëror që punon për fëmijët apo persona të tjerë të rrezikuar ose të pambrojtur në Republikën e Shqipërisë.
Asnjë vajzë e djalë nuk duhet të ketë më frikë!
Grabitqarët seksual të fëmijëve tashmë nuk do të bredhin më të lirë rrugëve të qyteteve dhe fshatrave tona!
Lagjet dhe komunitetet tona do të jenë më të sigurta .
Krimet seksuale kanë nevojë urgjente të ndëshkohen dhe grabitqarët seksuale të fëmijëve apo grave të vendosen në monitorim nga organet e ligjit.
Sot më shumë se kurrë kemi nevojë për të forcuar zbatimin e ligjit, forcimin e të gjitha institucioneve duke filluar nga ato arsimore, të policisë dhe deri tek hetimi me profesionalizëm i denoncimeve të krimit, te gjykimi i drejtë, i paanshëm dhe ndëshkimi me gjithë forcën e ligjit për këdo abuzues seksual.
Ndaj, ftoj çdo deputet, parti politike që ta miratojë këtë projektligj si një domosdoshmëri akute për shoqërinë tonë.
Në ditët në vazhdim do të organizoj takime, tryeza diskutimi me të gjitha grupet e interesit për të dëgjuar nga afër mendimet e tyre për këtë nisëm .
Gjithashtu, do të uroja në bashkëpunimin e të gjitha mediave për ta kthyer këtë çështje në temën e ditës në studiot e tyre e për të qenë të gjithë bashkë për të mbrojtur fëmijët, gratë, vajzat e vendit tonë nga ngacmimet seksuale dhe çdo lloj forme të dhunës ndaj tyre.
Ky ndryshim nuk bëhet vetëm nga një person apo nga disa por bëhet nga të gjithë për t’i thënë NDAL këtij fenomeni të tmerrshëm që po prek shoqërinë tonë.
Sot duhet të veprojmë pasi nuk ka kohë më për fjalë.
