Ish-kryeministri Sali Berisha është i bindur që në zgjedhjet e pjesshme lokale të 6 marsit, fitues do të dalin kandidatët e Komisionit të Përkohshëm të Rithemelimit të PD-së.
I ftuar në “Log”, Berisha u shpreh i bindur se kryedemokrati Lulzim Basha në këto zgjedhje mund të marrë vota vetëm nga të majtët, por jo nga demokratët.
“Nuk e ve njëri në diskutim që shumicën e ka PD dhe jo peng Basha. Do të marrë ca vota nga socialistët, po jo nga demokratët.”
I pyetur se çfarë do të bëjë nëse ndodh e kundërta, Berisha tha se kjo nuk mund të ndodhë asnjëherë.
Kreu i PBDNJ Vangjel Dule u shpreh mbrëmjen e 27 janarit në “Log” se përfaqësues të Partisë Popullore Evropiane janë ofruar që të negociojnë krizën e brendshme në Partinë Demokratike pas përjashtimit të Berishës.
Por ky pohim u hodh poshtë nga ish-kryeministri. Sali Berisha tha se nuk ka pasur asnjë tentativë për ndërmjetësim nga PPE, ndërsa shtoi se kompromisi i vetëm do të jetë vota e demokratëve për kryetar.
“Asnjë ndërmjetësim nuk ka pasur. Ka pasur një vendim të tyre, që të mbajmë neutral ndaj zhvillimeve në PD. Komunikimi ka qenë i vazhdueshëm dhe është me instancën përkatëse dhe ne nuk dimë. nuk janë shprehur, s’na e kanë thënë kurrë se duan të vinë. asnjë njeri nuk ka ardhur dhe janë të mirëpritur kurdo që të vijnë.”./Shqiperiaime.com.al
