Qendra “Konsumatori Shqiptar” përmbyll me sukses projektin “Indeksi i Konsumatorit Vendor”

Qendra “Konsumatori Shqiptar”, me mbështetjen e Lëviz Albania, një projekt i Agjencisë Zviceriane Për Zhvillim dhe Bashkëpunim, ka zhvilluar këtë të mërkurë, një konferencë përmbyllëse, në kuadër të projektit “Indeksi i Konsumatorit Vendor”.
Në takim kanë marrë pjesë përfaqësues nga institucionet e qeverisjes vendore, nga shoqëria civile dhe mediat.
Drejtuesja Ekzekutive, e kësaj Qendre, Ersida Teliti, duke folur mbi ecurinë e këtij projekti shpjegon se është hartuar një raport mbi gjetjet në 61 bashkitë e vendit, së bashku me rekomandimet përkatëse.
Referuar bashkisë Durrës, ajo shpjegon se ky institucion ka marrë përsipër hapjen e një zyre për mbrojtjen e konsumatorit.
Përgjatë kohështrirjes së këtij projekti, në fushën e mbrojtjes së konsumatorit u fuqizuan dhe
trajnuan rreth 75 përfaqësues të shoqërisë civile dhe mbi 20 gazetarë.
“- Hapja e një zyre në një nga njësitë e qeverisjes vendore ka bërë që të tejkalohet objektivi i këtij projekti.” – shprehet drejtuesja Teliti.
Aktualisht 5 bashki i janë përgjigjur pozitivisht kërkesës së komunitetit të banorëve përkatës, për të hapur një zyrë në mbrojtje të të drejtave të konsumatorëve, konkretisht:
Kukës, Peqin, Gramsh, Rrogozhinë dhe Patos.
Ndërkaq, në raportin e hartuar, nga Qendra “Konsumatori Shqiptar”, në përfundim të këtij projekti, paraqiten në mënyrë grafike dhe analitike, gjetjet dhe rekomandimet.
“- Nga 61 bashki, 15 kanë një zyrë për mbrojtjen e konsumatorit, në përputhje me ligjin ekzistues, 16 të tjera ja kanë kaluar një veterineri ose agronomi këtë kompetencë, bashkangjitur edhe strukturën përgjegjëse, ndërsa 30 bashki nuk kanë një zyrë për këtë qëllim, as sipas kuadrit ligjor, as sipas standardeve të përcaktuara.” – sqaron drejtuesja Teliti.
Rekomandimi i kësaj qendre është ngritja e një zyre për mbrojtjen e konsumatorit, pranë çdo autoriteti vendor, që do të sillte, jo vetëm fuqizimin e institucionit, por edhe ndërgjegjësimin e vetë konsumatorëve, duke krijuar hapësirat e domosdoshme për bashkëpunim, veçanërisht në lidhje me ankesat.
Pjesëmarrëse në takim ka qenë edhe përfaqësuesja e Lëviz Albania, Anahi Martinez, e cila e ka vlerësuar si një histori suksesi këtë projekt, pasi janë aktivizuar vetë qytetarët, duke hartuar kërkesat dhe duke ja adresuar institucioneve vendore për hapjen e zyrave për mbrojtjen e konsumatorit.
“- Qytetarët kanë qenë të angazhuar në të gjithë proçesin dhe për ne kjo është një pikë shumë e fortë e projektit, duke e shndërruar atë në një histori suksesi.” – thotë menaxherja e grantit, Martinez.
Projekti “Indeksi i Konsumatorit Vendor” filloi zbatimin e tij në Prill 2020, në 61 bashkitë e vendit.
Në bashkëpunim me komunitetin u mundësua hapja e zyrave për mbrojtjen e konsumatorit në 4 bashki, ndërsa shumë të tjera kanë vendosur si objektiv që gjatë vitit 2021 të mundësojnë hapjen e këtyre zyrave.
Gjatë kësaj takimi janë ndarë çmime dhe çertifikata mirënjohje për bashkitë nga komuniteti i banorëve.
Takimi u zhvillua, në përputhje me protokollin e sigurisë antikovid, të përcaktuar nga Ministria e Shëndetësisë dhe Mbrojtjes Sociale.