Mamaja e një 19-vjeçareje, Vjoleta Koroni, ishte sot e ftuar në emisionin “Shqipëria Live” në Top Channel, për të treguar se si vajza e saj është abuzuar kur ishte e mitur nga burri i hallës së saj.
Koroni ka treguar se Resmi Turani ka abuzuar me të bijën e saj që në janar të vitit 2015, kur ai punonte si taksist. Ajo u shpreh se si ai shkoi e mori në shtëpi në për të shkuar në Rinas për të marrë një grua në aeroport, dhe aty e kishte përdhunuar.
“Erdhi e mori në shtëpi, ne nuk donim ta linim. Tha se ishte edhe gruaja e tij, halla e vajzës. Atë nuk e kishte marrë me gjasmë nuk kishte vend në makinë, pasi gruaja që do merrte në aeroport kishte shumë valixhe”, tha Vjoleta.
Kjo e fundit tregoi se e bija i tregoi ditën e dytë kur ai e kishte dërguar në shtëpi. I kishte thënë vjehrrit dhe vjehrrës, por ata nuk e kishin lënë ta denonconte, pasi nuk i besonin vajzës.
“Më tha më kapi në Rinas, unë mblodha vjehrrin e vjehrrën, vëllain e burrit. Nuk më lanë të shtëpisë, më thanë gënjen çupa se është e vogël. Unë e besova shumë te vajza. Ai nuk e linte rehat. Edhe kur i solla të gjithë në shtëpinë e tij, ai e kërcënonte vajzën që të mos tregonte. Vajza kishte shenjat që ia kishte lënë ai. E kam pyetur Resmiun se pse ma bërë këtë, e ai më tha: Do të ndaj nga burri më tha mua. Ai nuk e la në asnjë moment vajzën time të qetë. Ai gjasmë bënte rrugën e taksistit, por i bënte roje vajzës time te shkolla. Vajza rrinte me shokët e shoqet e klasës, e ai thoshte se e kam parë me djemtë. Donte ta largonte nga shoqëria e klasës. Edhe kur e çova në shkollë të mesme, ai sërish e ndiqte”, tha ajo.
Më pas në vitin 2017, Resmiu erdhi e mori vajzën me pretekstin që do e dërgonte te shtëpia e tij për të bërë punët me gocën e tij.
“Në korrik të 2017, vjehrra dhe vjehrri im shkon në fshatin e tyre. Ai vjen te shtëpia ime dhe më thotë se dua vajzën se do bëjë disa punë shtëpie me gocën time. Unë i thashë jo. Ai bëri sikur po fliste në telefon me kunatin tim, dhe ai i dha leje. Por ai e mori. Unë dhe vajza nuk donim që vajzën ta dërgonim vajzën. Edhe mua o më shkatërronte, se më thoshte do të të ndaj nga burri. Edhe pse kundërshtova, ai e mori vajzën me pretekstin se do e dërgonte te shtëpia e tij që të bënte punë. Edhe vajza i tha se nuk donte. Kur kanë qenë në makinë, ai e ka bllokuar makinën që të mos zbriste vajza. Ai e ka gënjyer gjatë rrugës, derisa e ka dërguar në një fshat tjetër, në një pyll ku nuk kishte as shtëpi as njeri që të dëgjonte.
Kur vajza erdhi në shtëpi tha: “Dua ujë që të lahem”. I them aq pis u bërë që do lahesh. U la dhe del duke u dridhur. E pyes ça ke, e më thotë ai prapë më kapi. Herën e parë nuk më lanë njerëzit e burrit që ta denoncoja. Herën e dytë ika vetë. Nuk e shikoja dot më të më vinte në shtëpi”, tha Vjoleta.
Sipas saj, në polici Resmiu i ka thënë vajzës së saj se “do të lë gruan e do të marr ty”. Ajo shtoi se nuk ka pasur mundësi që të marrë një avokat dhe nuk e ka ndihmuar askush që të gjejë një.
Vjoleta u shpreh se ai ka bërë tre muaj burg dhe ka dalë. Ajo shton se nëse nuk vihet drejtësi, nëse ai nuk arrestohet dhe futet në burg, do ta vrasë vetë.
