Nga: Aurel Plasari
Përveç se në tekstet e historisë, Skënderbeu u bë në Europë edhe personazh romanesh, poemash, poezish, operash, dramash, madje edhe komedish. Ja këtu i përfshirë edhe në një kodik të rrallë, që i ka pas shpëtuar censurës së kohës, me titull “Libër karikaturash si të mira edhe të këqija”.
Në vizatimin me diçiturë “Zbavitjet e gëzueshme të Skënderbeut mbret i Arbërisë pasi ka marrë Krujën nën Turqit” (“Les joyeux passetems de Scanderbeg roy d’Albanie après avoir repris Croya sous les Turcs”) ai, me shpatën që e mban me të dyja duart, pasi ka vrarë një armik, është kthyer dhe po çan dysh armikun tjetër.
Autor i vizatimeve të kodikut quhej Charles-Germain de Saint-Aubin (1721-1786), projektues dhe vizatues qëndismash pranë mbretit Luigj XV. Kodiku origjinal u ble nga Ferdinand de Rothschild tek arkitekti Gabriel-Hippolyte Destailleur. Ruhet si pjesë e koleksionit “Rothschild” në Waddesdon Manor, Buckinghamshire, Angli.
Pavarësisht nga zhanri i vizatimeve, përfshirja e Skënderbeut ndër to dëshmon se sa e përhapur ka qenë fama e tij nëpër Europë edhe tre shekuj pas vdekjes së tij./inforculture.info
